Livččii go dus sávaldat eaiggáduššat iežat viesu, muhto it oaččo loana dábálaš báŋkkus? Ii leat doarvái iešmáksu? Suohkan geavaha álggahanloana gaskaoapmin veahkehandihte sin, geain lea ekonomalaččat váttis dilli, oastit iežaset viesu.
Lea go dus unnán sisaboahtu ja stuora ássangolut? De dus sáhttá leat riekti oažžut ássandoarjaga.
Ássandoarjja
Ássandoarjja lea mánnosaš doarjjaortnet stáhtas dutnje geas lea unnán sisaboahtu ja stuora ássangolut. Ohcanáigemearri lea juohke 25. beaivvi mánus.
Ássandoarjaga ozat elektrovnnalaččat husbanken.no. Viessobáŋkku neahttasiiddus gávnnat maid eambbo dieđuid ássandoarjaga birra, doppe sáhtát iskkat sisaboahtorájiid ja ássandoarjjokalkuláhtoriin rehkenasttit lea go dus riekti ássandoarjagii.
Jus leat jearaldagat ássandoarjaga birra dahje dárbbašat veahki deavdit ohcama.
Álggahanloatna
Álggahanloatna lea viessoruhtadanfálaldat dutnje geas vurdojuvvo leat guhkit áiggi váttisvuohta ruhtadit iežat ásodaga, geas ii leat iešmáksu ja gii it oaččo loana dahje doarvái loana dábálaš báŋkkus.
Suohkan váldá álggahanloana Viessobáŋkkus viidáset luoikkaheami várás. Don sáhtát oažžut álggahanloana viesu oastimii, huksemii, divodeapmái, heiveheapmái ja ođđasitruhtadeapmái jus lea várra ahte massat ásodaga. Suohkan geavaha maid álggahanloana gaskaoapmin bargofámu rekrutteremii. Jus orrundilálašvuohta hehtte du váldimis dahje doalaheamis barggu suohkanis, dahje jus orrundilálašvuohta hehtte ealáhusovdáneami, de sáhtát oažžut álggahanloana viessoruhtadeapmái. Álggahanloana sáhtát oažžut ollásitruhtádeapmái iešmávssu haga.
Álggahanloatna sáhttá fátmmastit erret eará
- du gii it oaččo loana dábálaš báŋkkus, it ge sáhte seastit ruđa iešmáksui
- bearrašiid geain leat mánát
- du geas lea doaimmashehttehus
- du gii oaččut oadjomávssuid
- vuorrásiid geat dárbbašit heivehit viesu vai sáhttet joatkit orrut ruovttus
- du geas leat sosiála- dahje dearvvašvuođahástalusat
- du gii sáhtát massit viesu bággovuovdimii velggiid geažil
Viessobáŋkku neattasiiddus sáhtát lohkat eambbo álggahanloana birra. Doppe gávnnat maid elektrovnnalaš ohcama. Suohkan meannuda ohcamiid ja doallá buot oktavuođaid ohcciiguin.
Áššemeannudanáigi lea 3 mánu.