Ovdal luoddafierpmádaga mearrideami luoddaevttohusa váikkuhusat galget čielggaduvvot ja sáddejuvvot gulaskuddamii. Gielda váldá vuhtii guoskevaš vuoigatvuođalaččaid, eiseválddiid, beroštusjoavkkuid ja geavaheddjiid ovdal go luoddafierpmádatevttohus sáddejuvvo gulaskuddamii. Loahpalaš mearrádusa dahká gielddastivra. Láhkaásahusmearrádusa sáhttet guoddalit eanaeaiggádat, vuoigatvuođalaččat, guoskevaš organisašuvnnat ja suorgeeiseválddit, vrd. mohtorjohtolatláhkaásahusa §4a gávccát lađđasa. Eanet dieđut njuolggadusaid birra gávdnojit miljøkommune.no siiddus.

Ráhkadat evttohusa, mii biddjo luoddafierpmádaga vuođđun Kárášjoga gielddas. Dán vuoro mii guovdilastit válddolaččat dálá luoddafierpmádaga, muhto leat plánen maid muhtun ođđa luottaid.
 

Luottaid mearrideamis gustojit čuovvovaš ráddjehusat:

• Luottaid ii galgga bidjat suodjalanguovlluide dahje evttohuvvon suodjalanguovlluide.
• Luottat eai galgga leat mearkkašahtti vahágin dahje hehttehussan boazodollui.
• Luottat eai galgga gáibidit eanadatduohtadeami.
• Luottaid lea vejolaš bidjat dušše meahcceeatnamiidda dahje johkajieŋaid ala, vrd. Mohtorjohtolatlága ulbmilmearrádusa.
• Gielda ii sáhte bidjat luotta priváhta eatnamii eanaeaiggáda lobi haga.
• Stáhta geaidnodoaimmahat galgá dohkkehit Fylkka- ja riikkageainnuid rasttildemiid.

  Gielda lea geatnegas váldit vuhtii:

• Šláma
• Olgostallama
• Luondduvalljodaga
• Ássan- ja bartaguovlluid
• Váikkuhusaid eanadagaide
• Kulturmuittuid ja kulturbirrasiid
• Vuoddjiid ja earáid dorvvolašvuođa

  Gielda láhčá dili boazodoalu, suorgeeiseválddiid, eanaeaiggádiid, vuoigatvuođalaččaid, ránnjágielddaid ja luoddafierpmádaga geavaheddjiid   mielváikkuheapmái. Mii ávžžuhat geavaheddjiid buktit evttohusaid rievdadusaid birra, mat dagahit luottaid buorebun ja lasihit dorvvolašvuođa.

  
  Kártta, mas lea ođđa luoddafierpmádatevttohus Kárášjoga gielddas lea oaidnimis dás. Mana kártavuđđui ja vállje --> Skohterluoddakárta --> Skohterluottat2021OđđaEvttohusat, vai oaččut oidnosii buot luottaid kárttas.

  Kárttá sáhttá geahčadit pdf hámis dás. (PDF, 2 MB)

  Dálá luottaid ja ođđaevttohusaid oppalašgeahčastat gávdno dás. (PDF, 645 kB) 

  Evttohusat sáddejuvvojit Kárášjoga gildii maŋimustá 26.6.2021. Merkes evttohusa áššenummariin 2021/10 čujuhussii
  postmottak@karasjok.kommune.no  dahje Poastaboksa 84, 9730 Kárášjohka.

  Mii bivdit merket geinnodatrievdadusaid kártii ja sáddet dan evttohusa mielde ( www.kommunekart.com  / www.nordatlas.no / www.norgeskart.no )