Gielda geavaha álggahanloana gaskaoapmin veahkehandihte du geas leat ekonomalaš váttisvuođat oastit dahje bisuhit ásodaga.  

Jus dus leat stuora ássangolut ja unnán dienas, de dus sáhttá leat riekti oažžut ássandoarjaga. 

Mii lea álggahanloatna? 

Álggahanloatna lea viessoruhtadanfálaldat dutnje gii it oaččo loana dahje doarvái loana dábálaš báŋkkus. Dus ii dárbbaš leat iešmáksu, muhto dus ferte leat dienas mainna nagodat gokčat loana olggosgoluid ja muđui eará dábálaš goluid. 

Álggahanloana sáhtát oažžut viesu oastimii, huksemii, ođasteapmái, heiveheapmái ja ođđasitruhtadeapmái. Dus sáhttá maid leat vejolašvuohta oažžut álggahanloana jus ássandilálašvuohta hehtte du váldimis dahje doalaheamis barggu gielddas. 

Loga eambbo álggahanloana birra dáppe ja movt ozat.: Álggahanloatna ja ássandoarjja - Kárášjoga gielda 

Mii lea ássandoarjja? 

Ássandoarjja lea mánnosaš doarjjaortnet stáhtas mii veahkeha du geas lea unnán dienas ja stuora ássangolut. Ulbmil lea sihkkarastit ahte buohkain lea ráđđi buori ja oadjebas ruktui. Dát guoská sihke dutnje gii láigohat ja dutnje gii eaiggáduššat ásodaga, nu guhká go deavddát dihto gáibádusaid dietnasa, opmodaga ja viesu ektui. 

Loga eambbo ássandoarjaga birra dáppe ja movt ozat: Álggahanloatna ja ássandoarjja - Kárášjoga gielda 

Jus dus leat jearaldagat álggahanloana dahje ássandoarjaga birra dahje dárbbašat veahki ohcat, váldde oktavuođa Nav Ávjováriin/Maria Graff, tlf. +47 960 44 238.