Advokáhttafitnodat Lund & co ovdanbuktá čoahkkimis duogáža ja váldočuoggáid stevnnegis, mii ovddiduvvo Meahcceduopmostullui.
Nugo diehtit de Finnmárkokommišuvnna eanetlohku, Gauslaa, Magga ja Henriksen, konkluderii oanehaččat ná:
- Stáhta ii lean ásahan eaiggádanvuoigatvuođa Kárášjoga eatnamiidda 1980:s.
- Kárášjoga álbmot eaiggáda Kárášjoga eatnamiid kollektiivvalaččat, earret guovlluid, maid priváhta olbmot eaiggádit ovddežis ja vejolaš guovlluid, maid eaiggádeapmi lea lágalaččat mearriduvvon eará eaiggádeddjiide.
- Vuoigatvuođalaččat leat sii, geat áiggis áigái leat registrerejuvvon ássin dálá gielddarájáid siskkobealde.
Kommišuvnna uhcitlohku, Heggelund ja Andersen, konkluderii ná:
- Stáhta lei vuođđudan cieggan riektedili eaiggádin buot eatnamiidda, earret priváhta eatnamiidda Kárášjoga gieldda siskkobealde 1980:s ja dat lea báikkálaš álbmoga cieggan riekteáddejupmi. Álgovuolggalaš kollektiiva riekti, mii Kárášjoga álbmogis lei, lea rievdan geavahanvuoigatvuohtan, mii dál lea regulerejuvvon Finnmárkolágas.
- FeFo hálddaša dasto rievtti, muhto ferte váldit govttolaččat vuhtii dan nannosit suodjaluvvon geavahanrievtti, man báikkálaš álbmot lea háhkan.
2020 juovlamánus mearridii FeFo stivra guorrasit eanetlogu konklušuvdnii. Dalle livččii kommišuvnna eanetlohkokonklušuvdna šaddan riektevuoimmalažžan maŋŋá vejolaš positiiva meannudeami Fylkkadikkis ja Sámedikkis. 2021 ođđajagimánus FeFo stivra mearridii liikká, gulatkeahttá Kárášjoga álbmoga dahje beroštusjoavkku, meannudit ášši ođđasit, maŋŋá go Fylkkadiggi oaččui eanetlogu stivrras. Mearrádussan šattai dat, ahte ovddit mearrádus fámohuhttojuvvui.
Vuoigatvuođalaččaid, nappo Kárášjoga álbmoga boahtte lávki lea ovddidit ášši Finnmárkku Meahcceduopmostullui. Dat dahkkojuvvo maŋimustá 11.06.2019.
Čoahkkimis lea buorre vejolašvuohta ovddidit gažaldagaid ja oažžut áddejumi ášši dilis.
Kárášjoga eatnamiid beroštusjoavku čohkkejuvvui olbmuin, geat ledje ovddideamen olles dahje oasi Kárášjoga eatnamiid eaiggátvuoigatvuođa kollektiiva gáibádusa ja Kárášjoga johkalegiid servviid ovddasteddjiin.
Dál go stevnnet ovddiduvvo Meahcceduopmostullui, de lea áššáigullevaš ahte buot organisašuvnnat ja beroštusjoavkkut, geat háliidit váikkuhit riekteprosessii ja geat dorjot stevnnega, sáhttet searvat ja nu nannet álbmoga vejolašvuođa vuoitit dikkis.
Sidjiide, geat formálalaččat servet stevnnegii, lea ovdamunnin ahte sii besset searvat digaštallamiidda advokáhtaiguin ja dainna lágiin maiddá veahkkin nannet álbmoga eaiggádanvuoigatvuođagáibádusa.
Media gulahallanolmmoš:
Svein-Atle Somby, 922 42 666
Gulahallanolmmoš organisašuvnnaide ja joavkkuide, mat dáhttot dieđuid mo searvat stevnnegii:
Rune Fjellheim, 910 09 320